Алматы мен Шанхай бауырластық туралы келісімге қол қойды

Шанхайда (ҚХР) өтіп жатқан үкіметаралық келіссөздердің қорытындысы бойынша Алматы мен Шанхай арасында бауырластық қатынас орнатуға бағытталған Ниет хатына қол қойылды.

Алматы әкімінің баспасөз қызметі жазғандай, бұл қадам достық байланысын нығайтып, бірегей мәдени мұрасы мен зор экономикалық әлеуеті бар қос мегаполситің өзара дамуы үшін жаңа мүмкіндіктер ашады.
Келісім экономика және сауда, ғылым мен технология, білім және мәдениет, денсаулық сақтау және туризм сияқты негізгі салалардағы ынтымақтастықты көздейді.
Құжатқа Қазақстанның Қытайдағы елшісі Шахрат Нұрышев пен Шанхай мэрі Гун Чжэн қол қойды. Келісімдер екі қаланың арасында тәжірибе және инвестиция алмасуды арттыру мақсатында көрмелер, семинарлар және мәдени іс-шаралар өткізуді қамтиды.
Шанхай — Қытайдың қаржы орталығы және әлемдегі ең ірі теңіз порты. Шанхай экономикасының негізгі салаларына қаржы қызметтері, сауда, логистика және жоғары технологиялық өндіріс жатады.

JQ-Aqparat
Сурет: Алматы әкімдігінің Телеграм-каналы