Ақтөбеде кепілде болған әйел есін жинады

Ақтөбеде кепілге алынған 40 жастағы әйел есін жинады, деп хабарлайды jasqazaq.kz.

Kazinform мәліметінше, оны Ақтөбе облыстық көпсалалы ауруханасының нейрохирургтары мен травматологтары емдеп жатыр.
Нейрохирургия бөлімінің меңгерушісі Мақсат Оразжанов: «Ем жүргізіліп жатқанына бір тәуліктен асты. Оған бас-ми жарақаты, мидың шайқалуы диагнозы қойылған. Ал травматологтар жарақатын таңып береді. Екі бөлім жауапты болғанымен, нейрохирургияда емін жалғастырады. Көгерген, жырылған жерлері бар. Бүгінгі таңда жағдайы орташа. Сана-сезімі ашық. Сұрақтарға нақты жауап береді. Бүгін не болғанын сұрады. Ол ата-анасының қайтыс болғанын білмейді. Жағдайдың қалай болғанын, не болғанын білгісі келді. Біз ол туралы емес, денсаулығы туралы көбірек айтамыз. Төсектен тұруға болмайды. Жүруге рұқсат еткен жоқпыз. Оның қолында әзірге телефон жоқ. Психологтар да кеше де, бүгін де кездесті. Мұндай диагнозбен 5-7 күн ем алады. Бірақ әрі қарай белгілі болады. Себебі психологиялық жағдайы ескеріледі. Қазір күзет тұр», — деді.

КТК телеарнасының мәліметінше, үш адамды кепілге алған күдікті келіншектің танысы екен. Ол үйге кіре сала, әйелден бастап, оның зейнеткер әке-шешесін аяусыз ұрып-соққан. Есік-терезені жауып, қарттарды пышақтап, жертөлеге қамап тастайды. Қаскөй сөзге көнбеген соң, полиция басып кіруге мәжбүр болған.

JQ-Aqparat

Фото: inform.kz