Желіде АН-28 ұшағының құлаған сәті түсірілген делінген видео пайда болды

Желіде АН-28 ұшағының құлаған сәті түсірілген делінген видео пайда болды, — деп хабарлайды Tengrinews.kz.

Бұл кадрлар жүк көліктері автотұрағында орнатылған бейнебақылау камерасына түсіп қалған. Видеодағы мерзім қайғылы оқиға болған күнгі уақытпен сәйкес келеді — 3 қазан, 18.47. Күн қарауытқан сәт, көше шамдары жағылған. Жаңбыр жауып тұрғанын да аңғаруға болады. 46-шы минутта бастапқыда құлап, кейін өртенгенін байқауға болады. Осыған дейін әуе апатынан қазақстандық белгілі дәрігер-профессорлардың қаза тапқаны хабарланған болатын. Денсаулық сақтау министрлігінің мәліметінше, 3 қазанда кешкі уақытта Алматыдан Шымкентке дәрігерлер бригадасы ауыр жағдайда жатқан жүкті әйелге көмектесу үшін аттанған. Еске салайық, 3 қазанда East Wing әуекомпаниясының АН-28 ұшағы ұшып шыққаннан кейін 12 минут өткенде радардан жоғалып кеткен еді. Кейін ұшақ Алматы түбінде өртеніп жатқан жерінен табылған. Бортта болған бес адам қаза тапқан.