Зейнеткердің атынан iPhone 13 рәсімдеген азамат ұсталды

Ақтөбеде ер адам зейнеткердің атына тауарлық несие рәсімдеп алған. Polisia.kz хабарлағандай, 30 жастағы ер адам 65 жастағы танысының үйіне барып, ипотека құжаттарын рәсімдейтінін айтып, телефоны арқылы екінші деңгейлі банктің қосымшасына кіріп, электроника дүкенінен оның атына тауарлық несие рәсімдеген. Атап айтқанда, күдікті құны 439 мың теңге тұратын iPhone 13 телефонына тапсырыс берген. Зейнеткер өзінің атына тауарлық несие алынғанын бірнеше күннен кейін біліп, полицияға жүгінді. Полиция қызметкерлері күдіктіні анықтап, полиция бөліміне жеткізді. Алаяқтық фактісі бойынша ҚР ҚК-нің 190-бабы 2-бөлігі бойынша сотқа дейінгі тергеу жүргізіліп жатыр. Полиция департаменті азаматтарды қандай да бір қаржылай операцияны жүзеге асыру кезінде мұқият болуға және бөгде адамдарға телефон бермеуді ескертеді.

JQ-Aqparat