Зейнетақы төлемі: жеке табыс салығы алып тасталуы мүмкін

Өткенде Сенат депутаты Бекболат Орынбеков БЖЗҚ-ғы артық ақшасын шығарып алғандар жеке табыс салығын (ЖТС) төлейтінін, бірақ соны алып тастау керектігін ұсынған болатын.

Премьер-Министр Әлихан Смайылов сенатордың сауалына жауап берді. Ол қолданыстағы салық заңнамасына сәйкес, азаматтардың барлық кірісіне 10 пайыз мөлшерлемемен жеке табыс салығы салынатынын еске салды. Жалақыдан зейнетақы қорына аударылған төлемнен ЖТС алынбайды, Сондықтан БЗЖҚ-дан артық төлемін шығарып алған адам 10 пайыз ЖТС төлеуі тиіс. «Кірістің осы бөлігі үшін кейінге қалдырылған салық салу қолданылады», — делінген жауапта.

Ал ұсынылып отырған зейнетақы төлемдерін ЖТС-тан босату бюджеттің айтарлықтай шығындарына әкеп соғады (2023 жылы – 13 464 млн теңге, 2022 жылы – 14 087 млн теңге).

Үкімет басшысының пікірінше, көтеріліп отырған мәселе халықаралық тәжірибені зерделеуді және талқылауды талап етеді. Қазір Мемлекет басшысының тапсырмасына сәйкес, жаңа Салық кодексі әзірленіп жатыр. Зейнетақы жинақтарын төлеу кезінде ЖТС ұстап қалуды алып тастау мәселесі аталған жұмыс аясында жан-жақты қаралады.

JQ-Aqparat