Үкімет тізгінін кім ұстайды?

Кеше Үкімет отставкаға кеткеннен бері жаңалықты құр жібермейтін қауым Астананың сол жағалауына құлақ түріп отыр. «Пәленше болады екен» деген сәуегейлердің көптігі сонша, болашақ премьердің есімі жазылған тізім ұзарып барады.
Ол тізімнің ішінде дипломат та, вице-премьер де, Мәжіліс спикері де, тіпті екі-үш әкім де бар.
Дегенмен болжам жасап, бас қатырмайық. Өйткені жұрт күтпеген тұлға тағайындалуы мүмкін ғой.
Мемлекет басшысына Премьер-Министрдің кандидатурасын басқарушы саяси ұйым — «Аманат» партиясы ұсынады. Конституцияға сәйкес, Мемлекет басшысы кандидатты мақұлдаса, Мәжілістің қарауына береді. Үміткерді депутаттар қолдаса, Президент жаңа Премьер-Министрді тағайындайды. Су жаңа Үкімет басшысы он күннің ішінде үкіметтің құрылымы мен құрамы туралы ұсынысын Президентке ұсынуы тиіс.
Әділін айтқан жөн, бұрынғы премьер Әлихан Смайылов аса қиын кезеңде министрлер кабинетін басқарып, біраз шаруаны тындырды. Енді кім келсе де, бұрынғы Үкіметтің ісін жалғастырып, сабақтастық дәстүрі сақталады деп үміттенеміз.
Гүлнар Ахметова