Елімізде отбасын құрғандарды тізбелейтін соңғы статистика көңіл көншітпейді. Үйленуге жігіттер, тұрмысқа шығуға бойжеткендер асықпайтын көрінеді. Оның себебі көп, сылтауы да таусылмайды. Кейбіреулер кесе-көлденең тартатын материалдық жағдайға, баспанаға қарап қалған ештеңе жоқ. Басты себеп – жыл өткен сайын жастардың мойынға жауапкершілік алғысы келмейтіні.
Заманауи насихаттың әсері қыздарға тиіп жатыр: бала туып, үй шаруасымен айналысуға асықпайтын бикештер көбейді. Оның үстіне қазіргі күйіп тұрған тақырып: отбасындағы зорлық-зомбылық мәселесі қызды да, жігітті де тосылтады. Қыздарды былай қойғанда, жігіттердің өзі «текке арандап қаламыз ба» деп ат-тонын ала қашады. Енді, міне, соңғы кезде отбасын құрғысы келетіндер емтихан тапсырады деген сыбыс шығып, одан сайын шошытып тастады. Шынымен солай ма?
Бұл сауалға Орталық коммуникациялар қызметінде өткен брифингте жастар және отбасы істері комитетінің төрағасы Қайрат Қамбаров жауап берді. Ол Мәжілісте қаралып жатқан заңда осыған ұқсас бөлік бар екенін жасырмады.
«Қазір Мәжілісте тұрмыстық зорлық-зомбылық туралы заң жобасы қарастырылып жатыр. Онда осындай бөлік бар, яғни отбасын құрмас бұрын кемінде бір ай жастарды оқыту жоспарланды. Әзірге қарастырылып жатыр», – дейді Қамбаров мырза.
Оның айтуынша, тәлімгер мен психологтар отбасын құрғысы келетіндермен жұмыс жүргізеді. Әйтсе де, бұл ұсыныс қабылдана ма, жоқ па, ол жағы белгісіз. Бір қарағанда, идея жақсы. Дұрыстап жүзеге асырса, әрине. Бюджеттен қаржы бөлдіріп, «мынанша семинар-тренинг өткіздік, оған осынша адам қатысты» деген құрғақ есепке құрылған көзбояушылыққа айналса, керегі жоқ.
Наргүл Мырзахмет