Тұрсынбек Қабатов 5 тәулікке қамалды

Ұшақ бортында стюардессаны балағаттап, жолаушылардың мазасын алған құқық бұзушы шоумен Тұрсынбек Қабатов болып шықты. Бұл туралы Жоғарғы соттың Телеграм-каналында жарияланған ақпаратқа сәйкес, Қабатовқа қатысты іс Астана қалалық Әкімшілік құқық бұзушылық істер жөніндегі мамандандырылған ауданаралық сотында қаралған.
Сотта шоумен стюардессалардың нашар қызметіне көңілі толмайтынын айтып, оларға өз ескертуін білдірген. Ол өзінің әдепсіз сөз айтқаны немесе айтпағаны есінде жоқтығын алға тартқан. Бірақ қоғамдық тәртіпті бұзғаны үшін кешірім сұраған.
Қабатовтың кінәсі куәгердің айғақтарымен, жолаушыны полицияға беру актісімен, бейнежазбамен және медициналық сараптама қорытындысымен расталды.
Сот шешімімен шоумен әкімшілік құқық бұзушылықты жасағаны үшін кінәлі деп танылды.

Сот шешімімен Тұрсынбек Қабатов 5 тәулікке қамауға алынды.

JQ-Aqparat