Таразда елдің үрейін ұшырған қанішер адамдарды өлтіріп, денесін қала шетіне көміп кетіп отырған

Таразда екі жыл бойы облыс тұрғындарын үрейде ұстаған қанішер Андрей Малько 19 жылға сотталды. Қолын қанға бояған қылмыскер бірнеше адамды өлтіріп, денесін қала шетіне көміп кетіп отырған.

Қолға түскен қанішердің кісі өлімінен басқа пәтер тонау және ұрлықпен айналысқаны анықталды, деп хабарлайды 31 арна.

Ол өткен жылы өзінің бөтелкелесін өлтіріп, мәйітін қала шетінен 2 шақырым жерге көміп, із суытып қылмыстық әрекетін жалғастыра берген. Тұрақты тіркеуде жоқ қаңғыбас көпқабатты үйлердің жертөлесінде жасырынып, иесіз үйлерде түнеп жүріпті.

Кейін аулада тұрған велосипедті қолды етіп, шағын цехқа жұмысқа тұрады. Бірақ адам өлтірген қанды қол онда да әріптесін пышақтап тастайды. Осылайша қауіпті қылмыскер іздеуде жүріп-ақ кісі өлтіруді әдетке айналдырған. Тәртіп сақшылары қанішерді тек осы жылдың сәуір айында қаладағы үйлердің жертөлесінде жасырынған жерінен қолға түсірді.

stan.kz