Төсек тартып қалған қостанайлықтың үйін көршілері тонап кеткен

59 жастағы қостанайлық азамат жүрек талмасынан кейін төсек тартып жатып қалған. Осыдан кейін барша туыстары одан теріс айналған екен. Тіпті, балалары да қарайлаудан бас тартқан.

Бұл туралы «Наш Костанай» басылымы жазды.

Көршілерінің айтуынша, Жақсылық мырза ешуақытта ішімдікті салынып ішпеген. Тек жүрек талмасы салдарынан сал болып, төсек тартып қалған екен.

Ер азамат әйелімен жуырда ғана ажырасқан. Ал балаларының барлығы жұмыста болғандықтан, әкелеріне қарайлауға уақыттары жоқ. Жақсылық мырза аштыққа шыдамай, ақыры көршілерінен көмек сұраған екен. Бейтаныс әйел оны бір ай бойы киіндіріп, тамақтандырып жүрген.

Жұмыс істей алмағандықтан, Жақсылық мырза пәтеріне бірге тұратын адамдарды кіргізген. Олар оның төсек тартып қалғанын пайдаланып, өздеріне қажетті дүние-мүліктерін алып тайып тұрған.