Су тасқыны: 16 мыңнан астам отбасына мемлекеттік қолдау көрсетілді

Елімізде алапат су тасқынынан зардап шеккен тұрғындарға келтірілген залалды өтеу жалғасып жатыр.

Мемлекет басшысы Қасым-Жомарт Тоқаевтың тапсырмасымен Үкімет осы жұмысты жүйелі түрде жүзеге асыруда.
Зардап шеккен аймақтардың тұрғындары арнайы құрылған өңірлік комиссияларға тиісті өтініштерін беруде. Бүгінге дейін 24 835 өтінім қабылданды.
Үкіметтің баспасөз қызметі хабарлағандай, биылғы 4 мамырдағы жағдай бойынша 16 168 отбасы 5,7 млрд теңгеден астам сомаға 100 АЕК мөлшерінде бір реттік төлем алды. Мал басының шығыны үшін берілетін төлем көлемі 916 млн теңгеден асты.
Бүгінгі таңда зардап шеккен өңірлерде 4556 тұрғын үй тексеріліп, 2845 нысанда бағалау жұмыстары жүргізілді.

Жөндеу жұмыстарын жүргізуге және тұрғын үйді қалпына келтіруге 696 млн теңгеден астам қаражат бөлінді. Аталған көмек 530 отбасын қамтыды.
Ақмола, Қостанай, Қарағанды және Павлодар облыстарында тағы 53 отбасыға қираған баспаналарының орнына үйлер мен пәтерлер берілді.
Залалды өтеу жұмыстары жалғасуда және Үкіметтің қатаң бақылауына алынған. Президент тапсырмасы бойынша барлық зардап шеккен азаматтарға жан-жақты көмек пен қолдау  көрсетіледі.

JQ-Aqparat