Сирияда ДАИШ-ты басқарған Қазақстан тумасының көзі жойылды

Ресейдің әуе-ғарыш күштері соңғы екі тәулікте Сирияда ДАИШ-тың жеті командирінің, сондай-ақ, Евфрат аймағындағы лаңкестерді басқарған Қазақстан тумасының көзін жойды. Бұл туралы Ресейдің Қорғаныс министрлігінің ресми өкілі Игорь Конашенков мәлімдеді.

«Жеті командирдің көзі жойылды, олардың ішінде Қазақстан тумасы Әбу Ислям әл-Казаки бар. Ол Евфрат аймағында ДАИШ лаңкестерін басқарып келген», — деді Игорь Конашенков. Басылымның мәліметінше, екі тәулікте Евфраттың шығыс аймағында ДАИШ-тың 304 лаңкесінің көзі жойылып, 170-тен аса лаңкес жарақат алды. Сондай-ақ, Ресейдің әуе-ғарыш күштері жалдамалы шетелдік лаңкестердің жиналатын орталығын жойып жіберді. Ол орталықта Солтүстік Кавказдың шамамен 40 лаңкесі болған.

tengrinews.kz