Сингапур еліміздің экономикасына 1,7 млрд доллардан астам инвестиция құйды

Президент Қасым-Жомарт Тоқаев Сингапур Республикасына мемлекеттік сапарында осы елдің Президенті Тарман Шанмугаратнаммен келіссөз жүргізді.
Aqorda.resmi Телеграм-каналы жазғандай, Қасым-Жомарт Тоқаев қазақ делегациясына сый-құрмет көрсеткені үшін алғыс айтып, бұл 20 жылдан астам уақыт ішінде Қазақстан Президентінің Сингапурға жасаған бірінші сапары екенін атап өтті. 1970-жылдары Кеңес одағының дипломаты ретінде қызмет еткендіктен, бұл елді өте жақсы білетінін және араға уақыт салып мұнда Қазақстан Президенті ретінде қайта келгеніне қуанышты екенін жеткізді.
Мемлекет басшысы Сингапурды уақыт сынынан өткен сенімді серіктес санайды. Бүгінде Қазақстанда 140-тан астам сингапурлық компания мен бірлескен кәсіпорын жұмыс істейді.

Бұл ретте Сингапурдың Қазақстан экономикасына салған инвестициясы 1,7 миллиард доллардан асты. Пандемия салдарынан туындаған экономикалық қиындықтарға қарамастан, екі жақты сауда көлемі көп ұзамай 2 миллиард доллардан асады.
Президент еліміз сенімді саяси диалогқа, қарқынды дамып келе жатқан сауда және инвестициялық байланыстарға бағытталған екіжақты ынтымақтастықтың мүлде жаңа кезеңіне жол ашуға ниетті екенін атап көрсетті.

JQ-Aqparat

Суреттер: Аqorda_resmi