Шымкент: Жыл басынан бері 218 адам тұрғын үй сертификатын алған

Әлеуметтік осал топтарға арналған «2 — 10 — 20» тұрғын үй бағдарламасы әкімдік кезегінде тұрғандарға беріледі. Бұл жетімдер, көп балалы аналар мен отбасылар, 1 және 2-топтағы мүгедектер, мүгедек бала асырап отырған отбасылардың баспаналы болуы үшін мемлекет тарапынан ұсынылатын жеңілдік. Шарты «5-10-20» бағдарламасына ұқсас. Тек мөлшерлемесі одан да аз, 2 пайыз.

Міне, осы бағдарлама бойынша Шымшаһарда тікелей броньдау басталғаны хабарланды. Іріктеу кезеңі — броньдау кезеңі аяқталған күннен бастап 5 жұмыс күні.

Бұл бағдарламаға:
— I және II топтағы мүгедектігі бар адамдар;
— мүгедек балалары бар немесе оларды тәрбиелеп отырған отбасылар;
— көпбалалы отбасылар;
— жетім балалар және ата-анасының қамқорлығынсыз қалған балалар қатыса алады.

Ескеретін бәр жәйт: сот әрекетке қабілетсіз деп таныған адамдар мәртебесі бар «І және ІІ топтағы мүгедектігі бар адамдар» санатындағы салымшылардан өтініш берген кезде еліміздің Азаматтық Кодексі 159-бабының негізінде банктік қарыз шарттарын жасасу (толық сатып алуды қоспағанда) мүмкін емес.
Өтініш беру «Отбасы банктің» жылжымайтын мүлік порталында жүзеге асырылады. Өтініштер ЖАО-да кезекте тұрған банк салымшыларынан ғана қабылданады.

Шымшаһар тұрғындарын баспанамен қамту саласында тағы бір жағымды жаңалық — биылғы жылдың 1 тамызынан бастап бүгінге дейін 49 отбасы қайтарымсыз негіздегі тұрғын үй сертификаты арқылы баспаналы болған. Әлеуметтік көмекті алушылар қатарында 16 отбасы – 1 және 2 топ мүгедектігі бар азаматтар, 9-ерекше бала асыраушы отбасылар, 3 — жетім және ата-анасының қамқорлығынсыз қалған азаматтар, 11 — көпбалалы отбасылар, 4 — толық емес отбасылар, 6 — бюджеттік мекеме қызметкерлері бар.

Тұрғындар «Отбасы банк» арқылы мемлекеттік бағдарлама аясында несиелік негізде пәтер рәсімдеу барысында оның алғашқы жарнасының бір бөлігін 1 млн теңгеге дейінгі тұрғын үй сертификаты арқылы жабу мүмкіндігіне ие болды.

Бүгінде тұрғын үй сертификаттарына өтінім қабылдау жалғасуда. Бұл қолдауға ие болу үшін тұрғын үй кезегінде тұрған азаматтар мемлекеттік бағдарлама аясында «2-10-20», «5-10-20» несиелік бағыттарының бірі арқылы конкурстан өтіп, банктің шарттарына сәйкес төлем қабілеттігін растайды. Қатысушы «Отбасы банктің» ипотекалық қарыз шартын мақұлдау хатын алған соң тұрғын үй сертификатына өтінім жолдай алады.
Жалпы жыл басында бұдан бөлек әр түрлі әлеуметтік санаттар бойынша 218 адам тұрғын үй сертификатын алды.

JQ-Aqparat
Сурет: Шымкент қаласы Өңірлік коммуникациялар қызметі