Шымкент: Медициналық ұйымдарда науқастарды қолдау қызметі жұмыс істейді

Шымкент қаласының денсаулық сақтау саласын дамытудың 2020-2025 жылдарға арналған жоспары ең басты төрт бағытты қамтиды. Олар — медициналық жәрдем көрсету қызметін жетілдіру, кадрлық ресурсты дамыту, қоғамдық денсаулық сақтау қызметін және денсаулық сақтау ұйымдарының инфрақұрылымын дамыту. Осы орайда еліміздің үшінші мегаполисінде біршама жұмыстар қолға алынып, жемісті түрде жүзеге асырылып келеді. Мәселен, жоспардағы бірінші бағытты іске асыру үшін тұрғындарға медициналық қызмет көрсету сапасын жақсарту мақсатында қолдау қызметі жолға қойылды.

Бүгінде Шымкент қаласындағы барлық медициналық ұйымдарда науқастарды қолдау қызметі жұмыс істейді. Әлеуметтік медициналық сақтандыру қорының мәліметінше, егер азаматтың тиісті медициналық көрсеткіштері бола тұра жолдама ала алмаса немесе оған медициналық көмек көрсетуден бас тартылса, қаралатын медициналық ұйымдағы «Пациенттерді қолдау және ішкі аудит» қызметіне шағымдануға болады. Мұндай қызметтің басты міндеті — халықтың сапалы медициналық көмекке қолжетімдігін қамтамасыз ету және арыз-шағымдарды «осында және қазір» қағидаты бойынша шұғыл түрде шешуге негізделген.

Науқастың арыз-шағымы емхана деңгейінде дұрыс қарастырылмаған жағдайда «Міндетті әлеуметтік медициналық сақтандыру қоры» КеАҚ Шымкент қаласы бойынша филиалына 8-7252-99-76-85 байланыс нөмірі арқылы шағым қалдыруға болады.
Тұрғындар медициналық көмек көрсету тәртібі мен сапасына қатысты өтініштерін «Qoldau 24/7» мобильді қосымшасы арқылы да жолдай алады. Әлеуметтік сақтандыру қорының мамандары медициналық ұйымға хабарласып, ақпаратты анықтайды және медициналық көмек көрсетуден бас тарту себептерін тексереді.

Ал медициналық қызмет алу барысында қосымша сұрақтар туындаса, 1414 байланыс орталығына хабарласып кеңес алуға болады. Telegram-дағы Saqtandyru-bot немесе fms.kz ресми сайтында да өтініш-шағымдар қабылданады.

Сондай-ақ шаһар тұрғындарының денсаулық мәселесі бойынша сауаттылық деңгейін арттыруда мобильді қосымшаларды пайдалану көзделген. Бұған мысал ретінде «Әлеуметтік әмиян» пилоттық жобасын айтуға болады. Бүгінгі күні ол медициналық мекемелерге енгізіліп, тұрғындар игілігін көре бастады. Жаңа жоба ең алдымен Шымкент қалалық № 6 емханасына енгізілген еді. Соның арқасында науқастар тегін босатылатын дәрі-дәрмектерге QR-код арқылы қол жеткізетін болды.

JQ-Aqparat

Cуреттер: Шымкент қаласы Әлеуметтік медициналық сақтандыру қоры