Шымкент: Медиацияны дамыту — басты міндет

Шымкент қаласында қоғамдық келісім мен жалпыұлттық бірлікті нығайту мақсатында Ө.Жәнібеков атындағы ОҚМПУ-да еліміздің Мәдениет және ақпарат министрлігі Этносаралық қатынастарды дамыту комитетінің «Қоғамдық келісім» республикалық мемлекеттік мекемесінің ұйымдастыруымен Қазақстан халқы Ассамблеясының «Елдесу және татуласу» жобасы аясында медиация институтын дамытуға арналған семинар-тренинг өтті.

Семинарды Шымкент қаласы ішкі саясат және жастар істері жөніндегі басқармасы «Қоғамдық келісім» мекемесінің басшысы Нұркен Әлімқұлов ашып, медиацияны дамыту жайына тоқталды.

– Өркениетті қоғамның іргесі заң болса, тұғыры – құқық. Медиация дегенде ең алдымен дауласушы тараптарды құқықтық жолмен өзара келісімге келтіру, заңның үстемдігі арқылы бірлікті сақтау мәселесі айтылады.
Бүгінгі семинар-тренингте медиациямен күнделікті практикалық тұрғыда айналысып жүрген мамандардың пікірлерін тыңдаймыз. Әрі баяндалған нақтылы мысалдар арқылы өз тәжірибемізді ұштайтын боламыз, – деді Н.Құрманұлы.

Екі күнге созылатын семинарға қаладағы мемлекеттік мекемелер мен құқық қорғау органдарының қызметкерлері, азаматтық қоғам институттарының өкілдері және этномәдени бірлестіктер мен қалалық ҚХА жанындағы қоғамдық құрылымдарының мүшелері, медиация кабинеттерінің үйлестірушілері қатысуда.
Семинар-тренингте Қазақстан Республикасы Мәдениет және ақпарат министрлігі Этносаралық қатынастарды дамыту комитетінің «Қоғамдық келісім» республикалық мемлекеттік мекемесінің сарапшысы Талшын Италиева, психолог-конфликтолог Резеда Баймухаметова сынды жоғары білікті мамандар шымкенттік тыңдаушыларға дәріс оқып, білімдерімен және оң тәжірибелерімен бөлісуде.

Семинарда дәріс оқитын жоғары білікті мамандар «Этномедиацияның негіздері», «Этникалық топтардың қатысуымен қақтығыстардың ерекшеліктері», «Қақтығыстарды өрістету кезеңдері», «Локализация әдістері», «Этносаралық шиеленісті анықтау тәсілдері», «Араздық тілі», «Этностереотиптер», «Этномедиатордың құзыреттері», «Дағдылар мен іскерліктерді талдау», «Практикалық кейстерді талдау» тақырыптарында дәрістер, талқылаулар, ой-пікірлерді қайта құрастыру бойынша практикалық дағдыларды түсіндіріп, кейстер негізінде дау-дамайды диагностикалау, реттеу, тараптарды татуластыру сынды тәжірибелермен бөліседі.

Жергілікті қызметкерлер мен медиаторлардың білім-білігін көтеруді көздеген семинар-тренингте этномедиацияның әлеуеті жан-жақты түсіндірілді.

JQ-Aqparat
Сурет: Шымкент қаласы Қазақстан халқы Ассамблеясы