Шымкент: Ең үздік концепция анықталды

Шымкент қаласын дамытуға арналған бағыттың бір і- қаладағы серуендеу алаңдарын қайта жаңғырту. Шымкент қаласы әкімдігінің баспасөз қызметі хабарлағандай, қала әкімдігі мен кәсіпкерлер арасында жарияланған серуендеу алаңының (бұрынғы балалар темір жолының 2-станциясы) аумағындағы кофехананың үздік концепциясы конкурсына 17 үміткер қатысты.

Арнайы құрылған 9 мүшеден тұратын комиссияның отырысында ұсынылған концепциялар егжей-тегжейлі қаралып, дауысқа салынды. Дауысқа салу барысында, байқаудың негізгі шарттарын ескере отырып қорытынды жасалдщы. Нәтижесінде, байқау арасында көп дауыс жинаған екі үздік концепция анықталды.

Біріншісі — А.Асқаров атындағы Дендросаябақ маңындағы бұрынғы балалар темір жолының станциясы аумағы бойынша «S.V.U. group» ЖШС-нің концепциясы 7 комиссия мүшесінің оң даусын жинады.

Екіншісі — Қажымұқан атындағы спорт стадионы маңындағы бұрынғы балалар темір жолының станциясы аумағы бойынша «Milita group» ЖШС-нің концепциясы 6 комиссия мүшесінің оң даусын жинады.

Жалпы жеңімпаз болған жобалардың артықшылықтарын айтатын болсақ. Дендросаябақ маңындағы бұрынғы балалар темір жолының станциясы аумағындағы «S.V.U. group» ЖШС-нің концепциясында Темір жол станциясының бастапқы кейіпі сақтала отырып, Дендросаябақта спортпен айналысатын қала тұрғындары мен қонақтарына арнайы киім ауыстыру орны қаралған. Оған қоса, локомотиві бар (паровоз) пойызға ұқсатылған әр-түрлі тематикадағы тамақтану орындары қарастырылған. Сонымен қатар қала тұрғындарының саябақ ішінде демалып, отбасымен серуендеуіне барлық жағщдай жасалады.

Сонымен бірге, Қажымұқан атындағы спорт стадионы маңындағы бұрынғы балалар темір жолының станциясы аумағындағы «Milita group» ЖШС-нің концепциясы ескі вокзалды тематикалық жаңашылдық бағытында құрумен қоса, балалар пойызының вагондарын қайта қалпына келтіріп, ішін кофетерий ретінде қолдану жобасымен ерекшеленді. Бұл да қала қонақтары мен тұрғындары үшін қызықты демалыс орнына айналатыны қуантады. Бұл саябақтардың қала тұрғындары үшін маңызы зор, ең бастысы саябақтағы негізгі орындар сақталады.

Оған қоса, жеңімпаз атанған қатысушылардың қоғамдық тамақтандыру саласында 15 жылдан аса тәжірибелерінің бар екендігі ескерілді.

Бүгінгі таңда, жоғарыдағы аталған нысандарды сенімгерлік басқаруға беру бойынша тиісті құжаттар рәсімделуде.

JQ-Aqparat

Cуреттер: Шымкент әкімдігінің баспасөз қызметі