Шымкент: Біздің мекен — болашаққа бастар жол

Шымкент қаласындағы №2 Оқушылар сарайы жаз айларында жұмысын тоқтатпай, тұрақты келушілердің орнына уақытша үйірмеге қатысушыларды қабылдайды. Шымкент қаласы білім басқармасы мәлімдегендей, №2 Оқушылар сарайы жыл бойы атқарған жұмыстары бойынша есептік концертін өткізді.

«Біздің мекен – болашаққа бастар жол» деп аталған концерттік бағдарлама аясында оқушылардың жыл бойы жасаған жұмыстары, әр түрлі салада жеткен жетістіктері көрсетіліп,көпшілікке таныстырылды.

Концерттің ашылуы №2 Оқушылар сарайының жас барбаншыларының әуенді композициясымен басталып, өнерлі оқушылардың концерттік бағдарламасына ұласты. Жиынға Шымкент қаласы мәслихатының депутаттары Асқар Молдабек, Лазиз Сүлейманов, Шымкент қаласы «Дарын» орталығының директоры Раушан Джеренова, Қаратау ауданының әкімі Р.Мүлкеманов, №2 Оқушылар сарайының қамқоршылық кеңесі, қосымша білім беру мекемелерінің басшылары және БАҚ өкілдері, ата-аналар қатысты.
Іс-шара барысында Д.Қонаев атындағы жалпы орта мектептің фойесінде Оқушылар сарайының шығармашылық көрмесі ұйымдастырылды.

Көрмеде қолөнер, қыш үйірмесінің заттары, көркем сурет, ағаш, робототехника, смартроботехника, гидропоника, КИП автоматика, 3D моделдеу, экология, биотехнология, физика, химия соңғы заманауи үлгідегі құрылғылар виар очки, лапороскопия сынды үйірмелерде оқушылардың жасаған бұйымдарын келушілер тамашалады. Ауқымды іс-шараға 500-ден аса оқушы атсалысты.
Жиын соңында жыл бойы атқарған еңбегі мен жетістігі үшін ұстаздар Шымкент қаласы мәслихатының, білім басқармасының, «Аманат» партиясының алғыс хаттарымен марапатталды.

Сонымен қатар Оқушылар сарайында гитара, қуыршақ театры, саксофон, флейта, таеквандо, шахмат, асық ату, волейбол, компьютерлік сынып, экология, гидропоника, бағдарлама жасау, сенсорикалық кабинет, дефектолог, фото-бейне өңдеу үйірмелері бар.

Спорт және сауықтыру бойынша 15 үйірме жұмыс істеп тұр. Таэеквандо, шахмат, еркін күрес, тоғызқұмалақ, грек-рим, каратэ-до, бассейн, дзюдо, үстел теннисі, футбол, асық ату, волейболл, кикбоксинг, фитнес-зал. Ғылыми-техникалық бағыт бойынша 11 үйірме бар. Оның ішінде нақты жұмыс істеп тұрғаны – 6 (физика, биотехнология, кипавтоматика, дизайн және 3Д модельдеу, робототехника. lego құрылысы, химия. Айта кетейік, №2 Оқушылар сарайында 5000 ға жуық оқушы білім алады. Олар 6 бағыт бойынша 62 үйірмеде өздерінің қабілеттерін шыңдауда.

JQ-Aqparat

Суреттер: Шымкент қаласының Білім басқармасы