Шетел азаматын соққыға жыққан күдікті құрықталды

Талдықорғанда шетел азаматын соққыға жыққан 24 жастағы күдікті ұсталды. Оқиға 19 қарашада, қаладағы супермаркетте болған. 28 жастағы шетелдікке жергілікті тұрғын қол жұмсап, қашып кеткен, деп хабарлайды Жетісу облыстық полиция департаменті.

Талдықорған полициясы жәбірленушінің арызы бойынша соққыға жыққан күдіктіні анықтады.
Бейнекамераға жазылып қалған оқиғаға екі адамның сөзге келіп қалуы себеп болған.

Іздеу нәтижесінде Талдықорған полицейлері шетелдік азаматқа қатысты бұзақылық жасады деген күдікке ілінген жас жігітті анықтады.

Ол Ескелді ауданының 24 жастағы тұрғыны болып шықты.

— 19 қарашада қалалық полицияға алыс шетелдің 28 жастағы өкілі жүгінді. Өз мәлімдемесінде ер адам оны қалалық супермаркеттердің бірінде ұрып-соққан. Жәбірленуші оған шара қолдануды талап етті. Тәртіп сақшылары күдіктіні бір сағат ішінде ұстап, полицияға жеткізді, — делінген Талдықорған полициясының ресми мәліметінде. Қазір күдіктіге қатысты тергеу амалдары жүргізіліп, Қылмыстық кодекстің 293-бабы бойынша іс қозғалған.

JQ-Aqparat