ШҚО тұрғынының мәйітті үйінің маңында көміп тастамақ болған сәті видеоға түсіп қалды

Жақында Риддерде жантүршігерлік жағдай болды. Тұрғындар таңғы сағат 4-ке қарай қорқынышты оқиғаның куәгерлері болған.

Содан олар полиция шақырып, барлығын видеоға түсіре бастаған. Видеодағы кадрлардан ер адамның мәйітті тұрғын үй жаққа қарай сүйреп бара жатқаны көрінеді. Видео авторлары ер адамның ол мәйітті бақшасында көміп тастамақшы болған деп болжап отыр. Оқиға орнына келген полицейлер ер адамды ұстап, оны уақытша ұстау изоляторына қамады. «29 жастағы күдіктінің үйіне қонаққа 45 жастағы ер адамды шақырғаны белгілі болды. Олар ішімдік ішіп, отырыс соңы төбелеспен аяқталған. Нәтижесінде қонаққа келген ер адам оқиға орнында көз жұмған. Ал үйдің иесі мәйіттен осылай құтылмақ болған көрінеді», — деп хабарлады ШҚО ІІД баспасөз қызметіндегілер. Қазіргі уақытта полиция оқиғаның мән-жайын анықтап жатыр. «Адам өлтіру» бабы бойынша қылмыстық іс басталды.

Tengrinews.kz