Шәй мен Гарри Поттерге деген махаббат

Әлемдік көрмеге Ұлыбритания күні қарсаңында Герцог Глочестер (ханзада Ричард) келді. Дәстүр бойынша екі елдің байрағы желбіреп әнұраны шырқалды. “Қазақпарат” хабарлағандай  ханзада Ричардты еліміздің инвестиция және даму вице-министрі Ерлан Хаиров қарсы алды. Ол екі ел арасындағы 25 жыл бойы үзілмеген дипломатиялық қатынасты атап өтті.

“Екі ел арасындағы мәдени байланыс өз алдына бөлек әңгіме. Ұлыбританияда көптеген қазақ студенттер білім алып жатыр. Оған қоса Алматы мен Астанада бой көтерген ағылшын мектептері бар. Елімізде ағылшын әдебиетінің де алар орны орасан зор. Шекспирді білмейтін адам кем де кем болса, Гарри Потерді білмейтін бала жоқ шығар. Біз де сіздер секілді шәй ішкенді жақсы көреміз. Көрмеде жақсылап көңіл көтересіздер деген сенімім мол”, — деді ол.   

Ханзада Ричард бұл көрменің ең алғаш 1851 жылы өткенін еске сала отырып, ЭКСПО 2017 көрмесі Астанада өтсін дегендердің арасында алғашқылардың бірі болып қолдағандықтарын айтты.