Серік Жұманғарин: Санкцияны қолдамаймыз, бірақ талапты орындаймыз

Қазақстан Батыс елдерінің Ресейге салған санкциясын қолдамайды. Бірақ оның талаптарына құлақ асады. Үкімет басшысының орынбасары Серік Жұманғарин осы мәселе бойынша еліміздің ұстанымын білдірді. Оның айтуынша, Қазақстан экономикалық шектеулерді енгізген коалицияға қосылмайды. Сондай-ақ біржақты санкция саясатын да қолдамайды. Өйткені АҚШ пен Еуроодақтың терістік көршімізге енгізген шектеулерінен кейін логистика және сауда тізбектері үзіліп қалды. Бірақ ел мүддесін ескере отырып, санкция талаптарын орындайды. Бұл экономикалық тұрғыдан тиімді. Біздің экономикамыз шағын болғандықтан санкция қысымына төтеп беруіміз екіталай. Сондықтан еліміздегі тиісті құрылымдар тікелей АҚШ және Еуроодақпен жұмыс істеп жатыр.
С. Жұманғарин, сонымен қатар, сындарлы санкция саясатының арқасында ешкімге есе жібермей отырғанымызды тілге тиек етті. Бұған еліміздің көпвекторлық саясаты ықпал еткені анық.
Айта кеткен жөн, Батыстың алпауыт компанияларының Қазақстанда аса ірі инвестициялық жобаларды іске асырып жатқаны да санкция «салқынын» сезбеуде маңызды рөл атқарып отыр.
JQ-Aqparat

Сурет: zakon.kz