Сарайшық киелі жерлер картасына енгізілді

Қазақстан халқы Ассамблеясының атыраулық жастары Сарайшық қаласына экскурсияға барды. Жеті хан жерленген киелі ордада топты мемориалдық музей директоры Молдаш Бердімұратов қарсы алып, қызықты тарихи деректермен бөлісті.

Экскурсия барысында жастар Сарайшық қаласы туралы толық ақпарат алып, мәдени тарихи ескерткіштерді тамашалады, экспонаттармен танысты.

Сарайшыққа саяхат жасау ғасырлар құпияларына терең бойлаумен бірдей. Мұражайдың естелік кітабынан осында әр мезгілде келген қоғам қайраткерлерінің, ғалымдардың, өнер шеберлерінің, шетелдік қонақтар мен көрермендердің ой-пікір, тілектерін оқуға болады. Атылмыш кітапта еліміздің әр аймағынан ғана емес, ТМД кеңістігі мемлекеттері, АҚШ, Австралия, Жаңа Зеландия, Жапония, Германиядан келген меймандардың пікірін оқуға болады.

Хан ордалы Сарайшыққа сапарды орыс, славян, казактар бірлестігі қауымдастығының Атырау облыстық филиалының төрағасы Владимир Заверткин мен жергілікті «Қоғамдық келісім» мекемесінің жетекшісі Тамара Аман-Турлина бастап барды.

Айта кету керек, Сарайшық кешені бүгінде «Рухани жаңғыру» бағдарламасы аясында жасақталып жатқан киелі жерлер картасына енгізілген. Ескі қаланы су шаюдан сақтап қалу мақсатында, бүгінде Сарайшық маңында Жайық жағасын бекіту жұмыстары жүргізіліп жатыр.