Былтыр қарашада келіншегін ұрып өлтірді деген күдікке ілінген Қуандық Бішімбаевқа қатысты сот отырысы бүгін таңертең жалғасты. Салтанат Нүкенованың ағасы Амангелді Айтбек өткен жылы наурызда оның қалай соққыға жығылғанын егжей-тегжейлі баяндап, бет-аузы көгерген суреттерін де көрсетті. Сол жолы қарындасына «мына түрімен келесі жолы сені өлтіреді, кетіп қал» десе де, көндіре алмаған.
Сондай-ақ ол Салтанаттың өлімі туралы алғаш кімнен естігенін де айтып берді.
«Кешкі 8-9 шамасында ас ішіп отырғанда Салтанаттың құрбысы Ленара телефон шалды. Ол қатты толқып «рас па» деп сұрады. Мен «жәй қауесет шығар» деп оны сабырға шақырдым», — деді ол.
Содан кейін Салтанатқа қоңырау шалғанын, оның жауап бермегенін, локациясын қарағанда телефоны үйде екенін анықтаған. Үйіне барып, 5-ші қабатқа көтерілгенде есікті қаққан. Ешкім ашпаған соң, үшінші қабаттағы Қуандықтың әке-шешесінің пәтерін қаққан. Онда да ешкім ашпаған. Ақырында 102-ге хабарласып, шынымен Салтанаттың қаза болғанын естіген.
Айта кетейік, Бішімбаевқа қатысты сот процесі онлайн режимде көрсетілуде. 27 наурыздағы сот отырысында экс-министр кінәсін мойындамайтынын, оған оқиғаның мән-жайын баяндауға пұрсат та берілмегенін мәлімдеген болатын.
JQ-Aqparat
Сурет: сот отырысынан