«Рухани жаңғыру» бағдарламасы әлем қазақтарын біріктіруі тиіс

«Президент Нұрсұлтан Назарбаевтың бастамасымен іске қосылған «Рухани жаңғыру» бағдарламасы өз елімізбен бірге, шетте жүрген қандастарымыз үшін де аса маңызды жоба болды» дейді «Оралман Жайық» қоғамдық бірлестігінің Атырау облыстық филиалының төрағасы Құдабай ҚАРЖАУОВ.

Оның ойынша «Нұрлы көш» атажұртты аңсағандар үшін, сөзсіз, үлкен бонустық карта болды. «Біріншіден, «Нұрлы көш» елдегі демографиялық ахуалдың жақсаруына, екіншіден, еңбек миграциясының реттелуіне мүмкіндік берді. Десе де, миграция саясаты деген уақытта, мемлекетті құраушы этникалық ұлттарды шекаралық аймақтарға орналастыру мәселесіне маңыз беру керек. Өйткені, әлемдік ахуал ұлттық қауіпсіздік мәселесіне көбірек көңіл бөлу қажеттігін көрсетіп отыр. Сондықтан, әсіресе, солтүстік аймақтарды қазақыландыру, этникалық қазақтарды сол аймақтарға қоныстандыруды ұсынамын. Осы мақсатта «Серпін» бағдарламасын мейілінше тиімді пайдалану маңызды. Ал, «Рухани жаңғыру» бағдарламасы әлем қазақтарын біріктіруші күшке айналуы керек» дейді ол.