Президент: Салықты жайдан-жай көбейте салуға болмайды

«Қазір жаңа Салық кодексі әзірленіп жатыр. Бұл құжат инвесторларға қолайлы жағдай жасау мен бюджетке қажетті көлемде қаржы түсірудің арасында көкейге қонымды теңгерім болуын қамтамасыз етуі керек. Алайда, бизнес қауымдастығында бұл құжат, ең алдымен, салық мөлшерлемесін өсіруді көздейді деген пікір қалыптасып отыр».

Бүгін Үкіметтің кеңейтілген отырысында Президент Қасым-Жомарт Тоқаев әзірленіп жатқан Салық кодексіне тоқталды.
«Қазақстанда түпкі мәні өзгеріп кеткен қосылған құн салығының өзін реформалау қажет. Оны 12 пайыздан 16 пайызға дейін көтеру мәселені шешпейді. Сарапшылар қосылған құн салығын көтеру көлеңкелі экономиканың үлесін арттырып, инфляцияның өсуіне әкеп соқтыруы ықтимал деп орынды пікір білдіріп жатыр. Бұл қадам еліміздің инвестициялық тартымдылығына да кері әсер етуі мүмкін», — деді Мемлекет басшысы.

Жаңа Салық кодексін әзірлеу барысына көңілі толмайтынын айтқан Президент алда ұлттық экономиканы сапалы әрі қарқынды дамыту міндеті тұрғанын еске салды.

Мемлекет басшысының айтуынша, табыс пен мүлікке салық салудың жаңа жүйесі енгізбесе, кәсіпкерлерді табысын қалтаға баспай, бизнесін дамыту үшін жұмсауға ынталандырмаса, арнайы салық режимдері өзгермесе, бұл міндетті орындау қиынға соғады. Сондықтан Салық кодексі секілді стратегиялық маңызы бар құжатты әзірлеуге осы сала мамандарынан бөлек экономистер мен бизнес өкілдері жұмылдырылуы қажет. Дегенмен бюджет қоржынын толтыру міндетін ұмытуға болмайды. Экономика неғұрлым қуатты болса, соғұрлым көп салық түседі деген қағидатты берік ұстану керек. Осы орайда Қасым-Жомарт Тоқаев: «Салықты жайдан-жай көбейте салуға болмайды. Ең алдымен, салық салу жүйесін реттеп, оны жетілдіру қажет. Сондай-ақ көлеңкелі экономиканы барынша азайту керек, яғни салық жүйесін басқару жұмысы дұрыс жолға қойылмаса, ең озық деген салық саясатының өзі тиімсіз болып шығады», — деп баса айтты.

Мемлекет басшысы Үкімет салық жеңілдіктерін берудің ашық әрі нақты ережелерін әзірлеуге тиіс екенін ескертті. «Қаржы министрлігінің мәліметі бойынша жеңілдік берудің салдарынан жыл сайын бюджетке орташа есеппен 7 триллионға жуық теңге кем түседі. Мен салық жеңілдіктерін 20 пайызға азайту туралы тапсырма бердім. Бірақ әлі күнге дейін орындалған жоқ, тіпті, мәселені шешу жолдары да әзір емес», — деді Президент.

JQ-Aqparat