Президент: Көшке ілесетін емес, көшті бастайтын ел болуымыз керек

«Шикізатқа арқа сүйеп отырған ел алысқа бармайды. Бізге ғалымдар, инженерлер, өнертапқыштар қажет. Мамандарымыз әлемдік бәсекеге төтеп бере алатындай білімді, білікті болуы керек».

Президент Қасым-Жомарт Тоқаев бүгін ғалымдармен кездесуде осылай деді.

«Бүгінде алпауыт елдердің арасында барлық салада бақталастық өршіп тұр. Біз осы күрделі кезеңде экономиканың жаңа үлгісіне көше бастадық. Әділ, инклюзивті әрі бәсекеге қабілетті экономика құруға кірістік. Ғылым мен инновация оның басты тірегі болуға тиіс», — деді Мемлекет басшысы.

Президенттің айтуынша біз көшке ілесетін емес, көшті бастайтын елдердің қатарында болуымыз керек. Бір сөзбен, ғылыми әлеуетімізді арттыру қажет. Әлбетте, бұл бағытта біраз шаруа атқарылып жатыр. Мемлекет басшысы Ғылым және технологиялар жөніндегі ұлттық кеңестің отырысында бірқатар нақты тапсырма берген болатын.

«Қазір «Ғылым және технологиялық саясат туралы» заң жобасы Парламентте қаралып жатыр. Кеше Сенат оны бірінші оқылымда мақұлдады. Бұл – өте маңызды әрі көптен күткен құжат. Ғылымды басқару жүйесін жетілдіру керек. Ғалымдарға әлеуметтік қолдау көрсету мәселесі де өте маңызды. Сондықтан Заңда ғылыми қауымдастықтың мүддесі барынша ескерілетін болады», — деді Президент.

JQ-Aqparat

Сурет: Aqorda.kz