Президент Қасым-Жомарт Тоқаев: Ораза қабыл болсын!

Бүгін, 11 наурызда күллі мұсылман қауымы үшін Рамазан айы басталды.

Президент Қасым-Жомарт Тоқаев ел-жұртты Қасиетті оразаның басталуымен құттықтап, игі тілегін жолдады:
«Қымбатты отандастар!
Сіздерді Рамазан айының басталуымен құттықтаймын! Халқымыз үшін Қасиетті оразаның мән-маңызы айрықша.
Бұл – қоғамда имандылық, адалдық, жанашырлық, мейірімділік сияқты мызғымас құндылықтарға барынша мән берілетін кезең. Бүкіл мұсылман қауымының ынтымағы артып, бір-біріне бауырмалдығы айқын көрінетін мезгіл.
Ораза айы рухани тазаруға, мұқтаж жандарға көмек қолын созып, қайырымдылық жасауға үндейді. Сол арқылы барша адамзаттың береке-бірлігі нығая түсуіне ықпал етеді.
Дін мен дәстүр сабақтастығын берік ұстанатын ел татулығын, тұрақтылығы мен тыныштығын сақтап, кез келген сын-қатерден сүрінбей өте алады. Мен Қазақстан халқының әрдайым рухани үндестікте өмір сүріп, болашаққа нық қадам басатынына сенемін.
Ораза қабыл болсын!
Баршаңызға зор денсаулық, амандық, толайым табыс тілеймін!».

Сурет: Ақорданың баспасөз қызметі