Павлодарда трамвай тағы да апатқа ұшырады

8 қыркүйек күні Павлодарда №1 бағыттағы трамвай рельстен шығып кетті. Оқиға таңғы 6:54 шамасында болған.

Трамвай басқармасының хабарлауынша, Ворушин көшесі соңғы аялдама болған. Жүргізуші жолаушыларды шығарып, жаңа адамдарды отырғызған. Қаладан шыға берісте артқы дөңгелектен ақау шығып, жолдан тайып кеткен.

Оқиға орынына жеткен арнайы бригада арнайы техниканың көмегімен трамвайды қайтадан рельске салды. Сағат 7:40-та қозғалыс қайтадан жанданды.

Еске салсақ, кеше кешке 7:43-те Ломов және Катаев көшелерінің қиылысында адам шошырлық апат болған. 2007 және 2009 жылы туған қыздар трамвай астына түсіп, үлкені көз жұмып, кішісі ауруханаға түскен. Трамвайды бес жылдық тәжірибесі бар 30 жастағы әйел басқарыпты.

Зардап шеккен қыздардың анасы күйеуі қайтыс болып, екі баланы өзі тәрбиелеп отырған. Қазір еріктілер бұл отбасыға көмек көрсетіп жатыр.

stan.kz