Павлодарда қазақ тілі әдіскері киіз үйдің ішінде тіл үйретеді (видео)

Павлодар қаласындағы мәдениет және демалыс саябағында құрылған киіз үйде тұрғындарға мемлекеттік тіл үйрететін «Тіл керуені» жобасы басталды.

«Тіл керуені» жобасының мақсаты – қазақ тілін үйрету ғана емес, сонымен қатар, ұлттық салт-дәстүрмен таныстыру және музей, театр сынды тарихи орындарда түрлі мәдени шаралар ұйымдастыру. Қазақтың дастарқанында ежелден бері орын алып келген бауырсақ, құрт, қоспа секілді ұлттық тағамдар да насихатталады. Тыңдаушылардың барлығы мемлекеттік тілде еркін сөйлеп кетпесе де, оң әсер алады деген ойдамыз”, – дейді облыстық «Ана тілі» орталығының директоры Шолпан Кенжекова.

Аталған жоба өткен жылы Ақсу қаласына қарасты Құркөл ауылында басталып, екі киіз үй құрылған. Осындай әдіспен жеті ауданның тұрғындарына ана тілін үйреткен. Жобаның қорытынды концерті Баянауыл ауданы Торайғыр ауылында болды. Оған 70 адам қатысып, Баянауылдың тарихи өлкетану музейіне экскурсия жасады. Ал, биылғы жылғы ерекше жайлау Павлодар қалалық саябағынан орын алды. «Тіл Керуеннің» әрбір қатысушысы әдістемелік кешен мен флэш-тренингін алды. Әдістемелік жобасы 50 сағатқа арналған.

“Жалпы «Тіл керуеніне» қатысушылардың жасына шек қойылмайды. Өйткені тіл мен мәдениет жасқа қарамайды ғой. Сондай-ақ тілді үйренгісі келетіндерге күнделікті өмірдегі тұрмыстық жағдайға бейімдеп, бірте-бірте сіңіру қажет”, – дейді әдіскер.

stan.kz