Оқу озаттары Түркістанның көрікті жерлерін тамашалады

Түркістан облысының оқуда озат, белсенді балаларға арналған «Бар мейірімділік балаларға» атты экскурсия ұйымдастырылды.

Жобаның басты мақсаты белсенділігімен көзге түскен мектеп оқушыларының дүниетанымын кеңейту, рухани азық сыйлау, жаңа ортаға бейімделу қабілеттілігін арттыру. Балаларға қуаныш сыйлап, қамқорлық көрсету болып табылады.

Іс-шараның ашылу салтанатына қатысқан облыстық жастар ресурстық орталығының басшысы Ернар Бектаев балаларға тәуелсіз еліміздің ертеңі екенін айтып, алған бетінен қайтпуға, білімде де, өмірде де озат болуын тіледі. Одан кейін өзі басшылық ететін мекенің жұмысымен таныстырды.

Экскурсия «Khanshaiym Plaza» сауда және ойын-сауық орталығында жалғасын тапты. Аталған орталықтың кинопарк залында балалар отандық киноны тамашалап, «Funky town» атракционында көңіл көтерді. Балаларға түскі ас «Jeti tandyr» асханасынан ұсынылды.

Одан әрі бүлдіршіндер Түркістан қаласының символына айналған Қожа Ахмет Ясауи кесенесін аралады. Көне нысанды көзбен көріп, тайқазанның тарихымен танысты. Сондай-ақ «Ұлы Дала елі» орталығынан ерекше әсер алып, өз таңданыстарын білдірді. Одан соң, балалар «Global coffee» кофеханасында тамақтанып, керемет әсерлерімен бөлісті. Бір күндерін көңілді өткізген мектеп оқушылары ерекше әсерде болып, өмірге деген ынта-жігерлері арта түскені байқалады.

Белсенді балалар Түркістан қаласының көрнекті орындары: Қожа Ахмет Ясауи кесенесi, «Khanshaiym Plaza» сауда және ойын-сауық орталығы, «Ұлы Дала Елі» музейін тамашалады. Жастар орталығының мамандары да 25 баланың қуанышына ортақтасып, экскурсияның көңілді өтуіне атсалысты.

Бибайша Нұржанқызы