ОҚО-да өзенге құлап кеткен жасөспірімнің денесі 6 тәулік өткен соң табылды

Оңтүстік Қазақстан облысында суға батып кеткен жасөспірімнің денесі 6 тәуліктен соң табылып отыр. Бұл туралы  ОҚО ТЖД Жедел-құтқару жасағы мемлекеттік мекемесінің құтқару бөлімшесінің басшысы Павел Вишенин айтты.

Іздестіру жұмыстары 6 тәулік бойы үздіксіз жүргізілген. Сүңгуірлер мен құтқарушылар Сайрам-су өзенінің арнасын тексеріп, өзеннен үш шақырым жерден 13 жастағы жасөспірімнің денесін тапқан. «Бұл оқиға 6 маусымда кешкі уақытта болған еді. Сайрам ауылында жасөспірім абайсызда өзенге құлап кетті. Алдын ала нұсқа бойынша, ол өзенге ойнап жатып құлап кеткен. Қайғылы жағдайдың нақты себебін тергеушілер анықтап жатыр», — деді Павел Вишенин. Жасөспірімнің денесін іздестіру кезінде өзеннің қатты ағысы қиындық туғызған. Сондай-ақ, көпір маңындағы қираған бетон плиталары сүңгуірлерге қауіп төндірген. Жасөспірімді іздестіруге 100-ден аса адам қатысқан.

Tengrinews.kz