Нұрәлі Әліп: Қазақ үшін жанымды беруге дайынмын!

07 қыркүйек 2024, 18:32

Қазақстан ұлттық құрамасы мен «Зенит» клубының ойыншысы Нұралы Әліп әлеуметтік желіде жанкүйерлерге ризашылығын білдіріп, соңғы берген сұхбатын дұрыс түсінбегендерге жауап берді.

«Қолдауларыңызға көп рахмет, Қазақ елі. Соңғы берген сұхбатымды дұрыс емес қабылдаған жандарға айтқым келеді. Мен қазақ тіліне қарсымын немесе сөйлемеу керек деген жоқпын, ондай ойым да болған жоқ. Өзім бір адамға (Нұрсұлтанға) келген қонаққа қонақжайлылығыңды көрсету керек деп айтқанмын. Бірақ ол адам мені дұрыс түсінбей, қазақ тіліне қарсымын деп ойлап, өз пікірін айтып, мені түсінбеді. Ұзын сөздің қысқасы: Мен өздерің сияқты қазақтың қарадомалақ баласымын. Қазақ елім мен жерім үшін жанымды беретін. Қазақты қазақ көтерер, біз – біргеміз, биік іргеміз», — деп жазды Н.Әліп.

Сөзінің соңында қазақты қазақ көтерер, біз – біргеміз, биік іргеміз деп түйіндеді.