Екі-үш күннен бері Қызылорда облысы Қармақшы ауданында екі мұғалімнің жұмыстан не үшін шыққаны туралы жаңалық БАҚ бетінен түспей қойды.
Білім саласында сапаны қамтамасыз ету комитетінің төрағасы Ернұр Дәуенов Фейсбуктегі парақшасында: «Қысқы демалыс уақытында Түркияның түнгі клубтарының бірінде қыдырып жүрген Қызылорда облысының екі мұғалімінің әлеуметтік желілердегі жарияланымдары ата-аналар қауымының наразылығын тудырды. Педагогтер жұмыстан босатылды», — деп жазды.
Ал inform.kz Қызылорда облыстық білім басқармасы екі мұғалімнің өздері арыз жазып, жұмыстан шыққанын мәлімдегені туралы хабарлады.
«Басқармаға қарасты Қызылорда облысы, Қармақшы ауданындағы №250 мектеп-лицейінде жұмыс істеген мұғалімдер ақысыз демалыс алған күндерінен бөлек, 2-5 жұмыс күндері аралықтарында белгісіз себептермен, ескертусіз жұмыстан қалған. Сол себепті ҚР Еңбек кодексінің 49-бабы, 5-тармағына сәйкес, өз арыздарымен жұмыстан босатылғандығын жеткіземіз», — депті облыстық білім басқармасы.
Бірақ білім басқармасы қалай ақталса да, «пойыз кетіп қалды».
JQ-Aqparat