Медиация көп мәселені шешеді

Қазақстан халқы Ассамблеясының атыраулық өкілдері дін аралық қақтығыстарды реттеуде медиация әдісін пайдалануға шақыруда. «Дін аралық проблемалар, жалпы, келіспеушілік қайдан туындайды?» деген мәселеге жауап іздеген семинар Атырау облысы әкімі аппаратының «Қоғамдық келісім» коммуналдық мемлекеттік мекемесінің ұйымдастыруымен өтті.

Діни ахуалдың күрделену себебі ретінде, мамандар негізінен әлеуметтік әділетсіздік, діни құрылымдар арасындағы қақтығыстар, адам құқығының бұзылуы, жұмыссыздық, фанатизм мәселелерін атап отыр. Сондықтан да, семинарға қатысушылар бүкіл әлемде дауларды шешудің ең тиімді тәсілі болып саналатын медиацияның көмегіне жүгіну маңызды деп есептейді. Статистикалық мәліметтерге сүйенсек, медиациялық процестің 83-85 пайызы жыл сайын сәтті шешімін табады екен.

Медиация институтына сұраныс Қазақстанда да артуда. Айта кетелік, атыраулық «Қоғамдық келісім» мекемесімен бүгінде медиациялық төрт бірдей орталық тығыз байланыста жұмыс істейді. Облыста 37 кәсіби медиатор тіркелген. Бітімгер мамандардың араласуы нәтижесінде күні бүгінге дейін Атырауда 442 азаматтық, отбасылық, еңбек даулары сотқа дейін жетпей шешімін тапқан.

Баян ЖАНҰЗАҚОВА