Әуежайлардағы арнайы техника мен жабдықтардың 50 пайызы тозған. Бұл туралы Үкімет отырысында Көлік министрі Марат Қарабаев айтты.
«Әуежайлардағы арнайы техника мен жабдықтарына тоқталатын болсақ, олардың тозу деңгейі 50 пайызды құрайды, жақын арада 230 бірлік техниканы жаңарту қажет. Сонымен қатар, барлық әуежайларда мобильділігі төмен жолаушыларға қажетті жағдайларды қамтамасыз ету үшін мүгедектер арбасын және амбулифт сатып алу маңызды мәселе болып тұр. Бұл жобаларды қаржыландыру жұмыстары жеке әуежайлар үшін өз қаражаты немесе жеңілдетілген кредиттеу есебінен атқарылатын болады. Ал, мемлекеттік әуежайлар үшін Қаржы министрлігімен бірлесіп бюджеттен қаражат бөлу мәселесін пысықтаудамыз», — деді Марат Қарабаев.
Сонымен қатар ол әуежайларға жақын жерлердің заңсыз берілуі ұшу қауіпсіздігіне қауіп төндіретіндігін атап өтті.
«Биыл әуежай аумақтарында жаңа объектілердің пайда болуына жол бермейтін заңнамалық өзгерістер қабылданды. Осыған байланысты әкімдіктер әуежай маңындағы аумақта заңсыз құрылысқа жол бермеуге ерекше назар аударып, бұрын берілген жер учаскелерін мемлекетке қайтару жөнінде шаралар қабылдауы қажет», – деді министр.
JQ-Aqparat