Қысқы марафон тұңғыш рет өтеді

Астанада 24 желтоқсан күні ел тарихындағы тұңғыш рет «AstanaWinter Marafon: мүмкіндік шегінен тыс» атты қысқы марафон өтеді. Бұл туралы Орталық коммуникациялар қызметінде өткен баспасөз мәслихатында еліміздің атақты марафоншысы Марат Жыланбаев хабарлады.

Жарыстың ұйымдастырылуына «Маrat#ON» марафон клубының құрметті мүшесі, атақты қазақстандық марафоншы Марат Жыланбаев, Астана қаласының әкімдігінің бұқаралық спорт іс-шараларын өткізу жөніндегі дирекциясының жетекшісі Азамат Имашев, ҚР Жеңіл атлетика федерациясы мұрындық болып отыр.
М.Жыланбаев «Өзім де бірнеше қысқы марафонға қатысқанмын. Атап айтқанда, Канадада, ТМД елдері ішіне РФ Санкт-Петерборда дәстүрлі түрде «Өмір жолы» қысқы марафоны өтіп тұрады. Қазақстанда неліктен өтпеді десеңіз, себебі, Елордамыз әлем елдері ішінде Ұланбатырдан кейінгі ең суық астана болып табылады. Бірақ, мен де, шәкірттерім де мұнда тұрған қиын ештеңе жоқ деп білеміз. Біз 300 ғана желаяқты қатыстыруды ойлап отырмыз. Себебі, тек дайындалғандар келеді. Марафонда сонымен бірге, биліктегі белгілі адамдар болады», — дейді. Жарысты үш қашықтықта өткізу жоспарланып отыр. Нақтырақ айтқанда, қатысушылар классикалық марафонда 42 шақырым, жартылай марафон 21 және 10 шақырымда жүгіреді. Марафонға қатысуға ниет білдіргендер marathonclub.kz сайтында 12-20 желтоқсан аралығында тіркелуі керек.