Қарағанды облысындағы ауылдық мектептердің бірінде туберкулез анықталды

Қарағанды облысының Бұқар жырау ауданындағы мектептердің бірінде туберкулезбен сырқаттану дерегі анықталды. Ата-аналар мектептің карантинге жабылмағанына алаңдап отыр. Бұл туралы inform.kz хабарлады.

Бұқар жырау ауданындағы Доскей ауылындағы орта мектепте туберкулезбен сырқаттану фактісі профилактикалық тексеру кезінде анықталған. Қарағанды облысы денсаулық сақтау басқармасының хабарлауынша, сырқаты анықталған оқушы бұрын осы дерттен емделген екен.

— Бұрын туберкулезбен есепте тұрған пациентті профилактикалық тексеру барысында аталған аурудың қайталанған асқынуы анықталды. Дерттің қайта өршуі жасөспірімнің жас ерекшелігіне байланысты гормондық қайта құру және иммунитеттің төмендеуі салдарынан болуы мүмкін, — деп хабарлады ведомстводан.

Басқа оқушылардың ата-аналары балалары мектепте туберкулез жұқтыруы мүмкін деп алаңдайды. Алайда, денсаулық сақтау басқармасы оқу орнында дезинфекция жүргізілгенін және дертке шалдыққан баламен байланыста болғандарға еш қауіп төнбейтінін айтады.

— Қазіргі уақытта пациент барлық қажетті ем-дом түрлерін стационарда алып жатыр. Жасөспірімнің оқу орны бойынша қорытынды дезинфекция жүргізілді. Барлық байланыста болған адам тексерілді. Жұқтыру фактілері анықталған жоқ. Оқушылардың ата-аналарына санитарлық-гигиеналық режимді сақтау және жұқтырудан қорғау шаралары жөнінде нұсқау берілді. Қашықтан оқытуды ұйымдастырудың қажеті жоқ, — деп толықтырды облыстың денсаулық сақтау басқармасында.

 Фото: freepik.com