Белгілі әнші, продюсер Қанат Айтбаев қазіргі кино тіліне қатысты ойын әлеуметтік желіде білдірді. Өнер иесі: «Сахна көше тіліне емес, көше сахна, кино, театр тіліне еліктеу керек.
Кино тілі рухани бағдар болуға тиіс! Кино тілі санаға тез жатталады, өскелең ұрпақ соны үлгі тұтады.
Кино арқылы тілді шұбарлап, боғауызбен ластау — қылмыс. Тілі ластанған ұрпақтың санасы кірлейді. Санасы кір ұрпақтан не үміт күтуге болады? Ауызы толған боқтық, санасы уланған қоғам дүбәра тобырға айналып, рухани құлдырауға ұшырайды. Жан дүниесі азып, тозған елдің өркендеп, дамуы неғайбыл.
Шығармашылық еркіндік болуы керек, бірақ ол ойына келгенді жасау деген сөз емес!
Әрбір туындыны жарыққа шығарған адам қоғам тәрбиесіне жауапты екенін естен шығармауы тиіс!
Кино тілін бақылап, бекітетін заңдық жүйе керек»,-деді.