Қалаға да, далаға да пайдасы тиді

Жуырда «Астана ЭКСПО-2017»  халықаралық көрмесі жоғары деңгейде өз жұмысын аяқтады. Осы орайда «Время» газеті көрмеге басшылық еткен Ахметжан Есімовтың дағдарыс-менджері ретіндегі қызметін сараптап шығыпты. ЭКСПО-ға дейін Алматы қаласы әкімі болып тұрғанда атқарған жұмысын жазған. Ауыл шаруашылығы министрі болғанда қандай ісімен ерекшеленді? Осы орайда басылым сол кездері А.Есімовпен бірлесе жұмыс істеген қоғамға белгілі тұлғалардың пікірін алыпты.

Кезінде Алматы қаласы әкімнің орынбасары болған Виктор Долженков А.Есімовпен жұмыс істеген уақытын жақсы біледі. Ол «2008 жыл. Ахметжан Есімов әкім қызметіне тағайындалған соң, екі аптадан кейін мені бірге жұмыс істеуге шақырды.  Құрылыс жұмыстары бірінен соң бірі тоқтап жатты. Қала тұрғындары арасында наразылық туындай бастады. Елімізде бұрын соңды болмаған үлескерлердің мәселесін шешу жұмысы тұрды. Негізінде үлескермен үй құрылысын жүргізетін компаниялар мемлекеттің қатысуынсыз өзара келісім келген. Дегенмен үкімет жедел түрде жұмысқа кірісіп, жергілікті әкімдіктерге зардап шеккендерге көмектесуге жол сілтеді.  Ақша бөлінді. Сол кездегі үкімет басшысы үлескерлер мәселесіне қатысты 120-ға жуық жарлыққа қол қойды. А.Есімов мәселені шешудің балама жолдарын да қарастырды. Банк басшыларымен екі жақа да тиімді тұсын ойластырды. Осылайша үлескерлер өз пәтеріне қол жеткізді» — дейді. Кезінде құрылыс, жер, архитектура және транспорт мәселесімен тікелей айналысқан қала әкімінің бұрынғы орынбасары Виктор Долженков тағы бір қызықты мәселені айтып берді. «Кезінде қалада жолаушы тасымалдайтын қоғамдық көліктің бәрі жекенікі болатын. Әр өңірден келгендер ескі автобустарымен қызмет көрсетеді. Жүргізушілердің тәртібі туралы айтпай-ақ қойсам да болады. Жұмысқа шыққысы келсе шығады, шыққысы келмесе шықпайды. Тарифті көтереміз деп қорқытады. Еш келісімге келмеген соң, қала әкімі муниципалды автобус паркін құру мәселесін тапсырды. Әкімдік газбен жүретін 400 автоусты несиеге алуға шешім шығарды. Дизелдің орнына газбен жүретін көлік алу өте тиімді болды. Бірінші кезекте экологияға зардабы тимейді. Екіншіден алған несиені газға үнемдеу арқылы тез қайтаруға болады. Ол кезде газ соляркадан үш есе арзан. Кейінірек автобус паркінде осындай 800 автобус болды» — дейді ол. Сондай-ақ алматылықтар Есімовтің кезінде құрылысы тоқтап тұрған метроның іске қосылғанын жақсы біледі. Алатау ауданының да құрылғаны сол әкімнің кезінде орын алған. Кезінде үйінің құжаты заңдастрылмаған, балалары мектепке бара алмай жүрген ауданда бүгінде барлық жағдай жасалды. Виктор Долженков «Есімовтің басқа да жұмысын айта берсе болады. Бірақ оны бір материалға сыйдыру» мүмкін емес деп өз ойын аяқтады.А.Есімов Алматы қаласы әкімі болғанға дейін, 2001 жылдан бері ауыл шаруашылығы министрі болған. Бұл жайында министрдің кеңесшісі Төлеухан Нұрқиянов баяндап берді. Оның айтуынша, А.Есімов министр етіп тағайындалған жылы өте қиын жағдай орын алған. Ол уақыттары ауыл шаруашылығында жабайы капитализм кезеңі болатын. Колхоздар мен совхоздар қарызға белшесінен батты. Ал Есімов осы мәселенің барлығының шешу жолын ойластырып, басшылықпен байланысып, біріге жұмыс жасады. Шешімін де тапты. Бірқатар заң жобалары қабылданды. Дәл сол уақытта бұл сала нарыққа бейміделе бастады.«Агрофирма «Отан» ЖШС директоры Иван Сауэр де А.Есімовпен жұмыс істеген жылдарды сағынышпен еске алады. Себебі дәл сол кезеңде мал шаруашылығын дамыту нақтылап қолға алынған. Мұндай жауапты істі жүргізу жұмысын министр Иван Сауэрге жүктейді. Қаншама қиындыққа қарамастан, тез уақытта заңнамаларға өзгеріс енгізіліп, малды сырттан әкелуде қосымша салық табысы алынып тасталды. Шаруа қожалығының иесі И.Сауэр «Біздің қолымыздан келді. Бүгінде басқалар бізден үйреніп жатыр. Есімов «ауыл шаруашлығының ең басты саласы мал шаруашылығы» деп әрдайым айтатын. Мен оны кейін түсіндім. Шынында да өсімдік шаруашылығы маусымдық жұмыс. Жылына 4-5 ай ғана. Ал мал шаруашылығы жыл он екі ай» — деп сол күндерді еске алады. Жалпы айтқанда, өзін дағдарыс-менеджері ретінде дәлелдеген А.Есімов қала да, дала да түйіні тарқамай тұрған мәселеге білек сыбана күрескен. Нәтижесі баршамызға белгілі.