Кезекті қаржы пирамидасы: тұтыну кооперативінің атын жамылғандар сотталды (Видео)

20 желтоқсан 2023, 12:18

Атырауда «QazHome» тұтыну кооперативінің атын жамылып, қаржы пирамидасын ұйымдастырған қала тұрғындары тиісті жазасын алды.
Олардың заңсыз әрекетін ҚМА Атырау облысы бойынша департаментінің қызметкерлері әшкереледі.
Ұйымдастырушылар азаматтарға жылжымайтын мүлік береміз деген желеумен қаржы пирамидасына ақша салу ұсынды.
Сотқа дейінгі тергеп-тексеру кезінде кооперативтің қызметіне 300-ге жуық салымшы тартылған, оның ішінде тек 35 адам ғана өтініш беріп, бұл өтініштер бойынша келтірілген шығын көлемі 49 млн теңгеден асатыны анықталды.
Сот үкімімен «QazHome» тұтыну кооперативінің басшылары кінәлі деп танылып, әрқайсысы 6 жылға бас бостандығынан айырылды.
ҚМА ел тұрғындарын тағы да ескертеді: өз қаржыңызды инвестициялағанда компанияның сенімділігін тексеру қажет. Осы мақсатта «Baiqa, piramida!» телеграм боты жұмыс істейді. Сондай-ақ ҚМА сайтында қаржылық пирамидалардың тізімі жарияланған.