Казиноға 400 млн теңге ұтылған бухгалтер сотталды

Астаналық бухгалтер өзі жұмыс істейтін компанияның қаржысын казиноға салыпты. Астана қаласының прокуратурасы мәлімдегендей, соттың үкімімен есепші құмар ойындарға ақша жұмсау үшін алаяқтық жолға түсіп, нәтижесінде 5 жылға бас бостандығынан айырылды.

Кінәлі әйел ЖШС-ның бухгалтері бола отырып, мекеме иелеріне шет елге тиімді инвестициялар салу туралы жалған айтып, оларды алдау арқылы 385,9 млн теңгеден астам қаражатын иемденген. Сотталған адам ұрланған ақшаның басым бөлігін казинода ұтылған. Іс бойынша қатысқан мемлекеттік айыптаушы сотталушының кінәсін дәлелдеді. Сот үкімі заңды күшіне енді.

JQ-Aqparat