«Инженер-гидролог такси жүргізуге мәжбүр». Депутат еңбек нарығындағы түйткілдер туралы айтты

Мәжілісте өткен «Қазақстанның еңбек нарығын дамыту және кадрлық әлеуетін нығайту» атты Үкімет сағатында Асхат Аймағамбетов еңбек нарығындағы теңсіздік пен маман тапшылығы туралы мәселе көтерді. Ол жуырда таксиге мінгенде Сержан деген жүргізушінің мамандығы инженер-гидролог болса да, жолаушы тасымалдаумен айналысуға мәжбүр екені туралы әңгімеледі. Себебі инженер-гидрологтың жалақысы көнкөріске жетпейді дейді.

Осы орайда депутат: «Біз маман жетіспейді дейміз, бірақ «гидромелиорация» мамандығына бөлінген гранттарға бірде-бір адам өтініш бермеген. Конкурста 0 адам болды. Көлік құрылыстары бойынша бөлінген 300 гранттың тек 29-ына адам қабылданды, яғни бір грантқа 0,1 адам келіп отыр. Бұл мысалдар кадр тапшылығы күрделі мәселе екенін айқын көрсетеді. Проблема тек грант санында әлде оның дұрыс бөлінбеуінде ғана емес. Тіпті, оларды дайындайтын колледждер мен университеттердің болмауында немесе олардың оқыту сапасында еместігі бәрімізге анық деп ойлаймын», — деді.

Аймағамбетовтың айтуынша, 2008 жылдан бастап жұмыспен қамтудың 5 бағдарламасы қабылданды. Сонда әр екі жыл сайын жаңа бағдарлама қабылданып отырған.

«Олар қандай нәтиже берді? Егер жұмыспен қамту шараларын негізгі құралдары мен әдістері арқылы талдайтын болсақ, осы жылдар бойы концептуалды түрде айтарлықтай өзгермегенін және негізінен уақытша сипатта болғанын байқаймыз. Біз әлі күнге дейін көбінесе «тізесі шыққан» шараларды қолданудамыз. Жаңа жүйелі шаралар аз, сол баяғы уақытша жұмыс орындарын құру, оқыту және қайта оқыту, шағын несие беру және басқалары. Ал жергілікті деңгейде бұл шаралар қоғамдық жұмыстарға тартудан, әлеуметтік жұмыс орындарын ұсынудан және жастар практикасынан аса алмай отыр. Осы шаралардың қаншалықты тиімді екенін де зерттеп жатқан ешкім жоқ», — дейді ол.

JQ-Aqparat

Сурет: parlam.kz