Иесін өлтіріп көлігін сатуға қойған

Алматы облысының полициясы таксисті өлтірді деген күдікпен екі адамды ұстады, деп хабарлайды облыстық ІІД баспасөз қызметі.

Пышақталған ер адамның мәйіті 12 желтоқсан күні Еңбекшіқазақ ауданындағы Амангелді ауылының маңынан табылды. Полицейлер марқұмның кім екенін анықтады.

Ол Volkswagen Golf 4 көлігімен жеке тасымалдаумен айналысқан 28 жастағы Алматы тұрғыны болып шықты.
Күдіктілер екі тәуліктен кейін ұсталды.

«Күдіктілер Талдықорған дәмханаларының бірінде ұсталды. Олардың айтуынша, қылмыс Алматыда жасалған, оны жасыру мақсатында зардап шегушінің мәйітін облыс аумағына әкеліп тастаған. Қылмыс қаруы болған қалта пышағы тәркіленіп, қылмыстық іс материалдарына қосылды», — деп хабарлады Алматы облысы ІІД баспасөз қызметі.

Күдіктілер — Кебұлақ ауданының екі тұрғыны. Олар бұрын қылмыстық жауапкершілікке тартылған: бірі қарақшылық, екіншісі алаяқтық жасаған.

Белгілі болғандай, таксистің автокөлігі интернет арқылы сатуға шығарылған.

ҚР ҚК 99-бабы (Кісі өлтіру) бойынша тергеу жүргізіліп жатыр.

Sputnik