Есіктегі зорлау ісіне қатысты сот үкімі шықты

Есіктегі Еңбекшіқазақ аудандық соты Жібек Мусинаны зорлады делінген сотталушыларға қатысты сот үкімін шығарды.

Tengrinews.kz хабарлағандай, «Асхат Бектұрсын 10 жылға дейін, Алмас Ермеков 9,5 жылға дейін, Ербол Ермеков 8 жылға дейін, ал Елтай Нұрбол 9 жылға дейін бас бостандығынан айырылсын», — деп шығарды үкімді судья Ерлан Баймолдинов.

Осыған дейін Есікте жаппай зорлау оқиғасы бойынша сот тергеуінің қайта жүргізілетіні хабарланған болатын.

Еске салайық, бұл оқиға тамыз айында болған еді. Зорланған қыздың туыстары әлеуметтік желілерде оны 14 тамызға қараған түні кафеден бауырымен бірге шыққан сәтінде біреулердің ұрлап әкеткенін хабарлаған еді. Оларға төрт адам шабуылдаған делінеді, екеуі қызды көлікке күштеп отырғызса, тағы екеуі бауырына шабуылдаған. Осыдан кейін бауыры оқиға жайлы туыстарына айтып, кейін олар іздестіріп, қыз жатқан көлікті тауып алған.