ЭКСПО аумағына жарылғыш зат қойылғаны туралы жалған ақпарат берген адам ұсталды

Полиция қызметкерлері ЭКСПО аумағында жарылғыш зат қойылғаны туралы жалған ақпарат берген ер адамды қолға түсірді.

Астана қаласы ІІД Жедел басқару орталығының «102» каналына көрме аумағында жарылғыш құрылғының орнатылғаны туралы ер адам қоңырау шалды. Жедел іздестіру шараларын өткізу кезінде қысқа уақыт аралығында полицейлер Оңтүстік Қазақстан облысының 32 жастағы тұрғынын қолға түсірді. Ол мас күйінде аталған бұзақылықты жасағандығын мойындады. Медициналық куәландырудың қорытындысына сәйкес ер адамның мас екендігі анықталды. Аталмыш факт ҚР ҚК 273-бабы (терроризм актісі жөнінде жалған ақпарат таратқаны үшін) бойынша сотқа дейінгі тергеулердің бірыңғай тіркеуіне алынды. Ұсталған күдікті уақытша ұстау абақтысына қамалды. Тергеу жүргізілуде. Полицейлердің қолдануындағы заманауи технологиялардың арқасында аталған қылмыстық заң бұзушылықтарды жасағандар бір кезекшілік тәуліктің ішінде анықталады. Мұндай әрекет қылмыстық жауапкершілікке әкеліп, материалдық залал өндіріледі.

24.kz