Екібастұзда целлофанға оралған ер адам табылды

М.Әуезов көшесіндегі үйдің ауласында сыртынан ешқандай тіршілік белгісі жоқ, целлофанға оралған ер адам жатқанын итімен таңертеңгі серуенге шыққан қала тұрғыны байқаған, деп хабарлайды Pavlodarnews.kz.

Облыстық полиция депаратменті баспасөз қызметінің мәліметінше, қала тұрғыны әдеттегідей таңертең сағат 07.00-де итін серуендету үшін далаға шыққан.

— Қала тұрғыны бірден полицияға хабарлауға асыққан, дегенмен өзімен бірге телефоны болмаған соң жақын жерде орналасқан автотұрақ қызметкерлерінен полицияға хабарлауды сұраған. Оқиға орнына жеткен полицейлер целлофанды ашып жатқан кезде ер адам кенет орнынан тұрып, жүгіре жөнелген, — дейді департаментте.

Ол бір күн бұрын алкогольді көп ішіп қойып, үйіне жете алмай қалған соң жерден целлофан тауып алып, үстіне жауып алып, ұйықтап қалған.