Екібастұзда білім беру бөлімінің басшысы 45 мектептен 100 мың теңгеден жинаған

Екібастұз қалалық білім беру бөлімінің басшысы Нұржамал Макумова қамауға алынды.

Бұл туралы сыбайлас жемқорлыққа қарсы іс-қимыл ұлттық бюросының Павлодар облысы бойынша департаменті тергеу басқармасының өкілдері мәлімдеді. Басқарма басшысы Руслан Куватовтың айтуынша, қалалық бөлім басшысы ақша жинаудың жүйелі іс-қимыл әрекетін ұйымдастырған.

«Бұл жүйе бойынша ақша тапсыруға Екібастұз қаласының мектеп директорлары тартылды. Бөлім басшысы Ұлттық Бірыңғай тестілеуді табысты өткіземін деп, 45 мектептен 100 мың теңгеден жинаған. Бүгінгі таңда аталмыш жүйеге тосқауыл қойылды, ал тергеу амалдары жүргізіліп жатыр. Кейін іс материалдары комиссия мүшелеріне жолданады» дейді Руслан Куватов.

Мамандардың айтуынша, шенеуніктің бұл әрекеті алаяқтық деп танылды.

«Қазіргі таңда бөлім басшысы тергеу изоляторында. Сот шешімімен қамауға алынды» дейді Руслан Куватов.

Айта кетейік, Нұржамал Макумова 1968 жылы туған. Екібастұз қаласы әкімдігінің білім бөлімінің бассшысы лауазымында 2014 жылдан бері еңбек етті.

Baq.kz