Депутаттар тәуелсіз БАҚ-қа грант бөлуді ұсынды

Бүгін Мәжілісте өткен басқосуда бұқаралық ақпарат құралдарын қаржыландырудың жаңа ережесі талқыланды. Мәдениет және ақпарат вице-министрі Қанат Ысқақов бүгінде мемлекеттің ақпараттық саясатын қаржыландыру барлық БАҚ-қа қатысты екенін атап өтті.

Қазір мемлекеттік БАҚ-қа бөлінген қаржының 51 пайызы теле-, радиоарналарға, 36 пайызы баспасөзге, 13 пайызы интернет-ресурсқа бағытталған. Тәуелсіз БАҚ-ты қаржыландыру мемлекеттің ақпараттық тапсырысы шеңберінде жүзеге асырылады.
Жаңа заң жобасында депутаттар тәуелсіз БАҚ-ты тақырып бойынша грант бөлуді ұсынып отыр.

«Бізде қазір тек республикалық БАҚ-ты қаржыландыра аламыз. Мемлекеттік тапсырыс республикалық БАҚ-тарға ғана арналады. Заң жобасы қабылданғаннан кейін жергілікті атқарушы органдар жекелеген мақсатты грант арқылы балалар контентін және аймақтық баспасөзді қаржыландыру мүмкіндігіне ие болады», — деді Қанат Ысқақов.

Вице-министр түсіндіргендей, грант бойынша қаржыландыруда 25-30 тақырыптық бағыт бекітіледі. Бұл жұмыспен арнайы комиссия айналысады. Қазіргі кезде мемлекеттік емес БАҚ-ты қаржыландыруға төрт млрд теңге қарастырылған.

JQ-Aqparat