Депутат Дәулет Мұқаев 38 жастағы әйелдің тұсауын кесті (Видео)

Сурет: Видеодан кадр

Мәжіліс депутаты Дәулет Мұқаев 38 жастағы бес баласы бар әйелдің тұсауын кесіп, айды аспанға бір-ақ шығарды. Бұл туралы КТК телеарнасы хабарлады. 

Бұған дейін Инстаграм парақшасында «оптом» тұсау кесемін деп хабарландыру берген депутат, бұл ерсі көріністі «арасында болып тұрады» деп түсіндірген. Тіпті «сәуір айына елу адам кезекке тұрып үлгерді, сіз де үлгеріңіз» деп, оқырмандарына құлаққағыс айтқан. Дегенмен 38 жастағы әйел мұнысын ұят көрмейді. Керісінше, «халық қалаулысына тұсау кестіру арманым болатын» дейді. Сондықтан бұған дейін тұсауы кесілсе де, көпбалалы ана баласынан қалыспапты.

Тұрсынкүл Құлатаева: — Халқымызға қалаулы бір азаматқа тұсауымды кестірсем деп, өзіме алдыма мақсат қойып жүргем. Сол сәт кеше туды. Дәулет мырза балалардың тұсауын жаппай кесетін күніне сәйкес келіп қалды, Жібімді сатып алдым да, алдына бардым. Сонымен Дәулет мырза қарсы келген жоқ. Тұсауымды кесіп, арманымды орындап берді. «Гештальт жабылды — бастысы».